Demand pichin ahih kei leh general strike puang dingin JAC/JSO in govt vau

LAMKA, September 26 : Apaisa September 7, 2012 nitak dak 9:00 vel a Sehpu, Ex-MLA leh a lawm te mi 2 in, S. Nahbil khua hausa Henkhothang Haokip a thah na uh toh kisai,lungkim loua JAC kiphuan ten, zan apan in government office te khaak sak in office staff te kai sak lou uhi.

Hiai bang in JAC pawl in kiphinna te nei mah le uh, governemnt lam in ngaihsak tuan lou in, office te, security te thahaat na in hon sak in om ve ve hi. Hiai toh kisai in tuni sunnung lam in JAC te makaih mah in, Joint Students Organisation ten meeting nei nawn in huai ah thupuk na tuam tuam la uhi.

JAC lam apan thu kiza dan in, S. Nahbil hausa Henkhothang Haokip sihna oth kisai a demand tuam tuam a bawl te uh, pichin ahih louh ziak a hiai bang a kiphinna a pat uh hidan in gen ua, zan apan government activity te him him boycott puang in leh office te khaak sak ua, himahelh security te haatna ziak a hon a om ahihdan gen in, a kiphinna pen uh khawllou a, a khauh zaw sem a pai tou lai ding uh ahihdan gen uhi. Huai ban ah, hiai bang a government office te a khaak sak hun ua, office staff a kai aom hiam ahih kei leh, a office a thil a deih huai lou lam tung a om leh JAC ten a mawh po lou ding uh chi in leng gen uhi.

JAC ten a gen zel dan un, a thil demand te uh pichin ahih theih na ding a kiphinna chi tuamtuam pan mahle uh government lam in ngaihsak tuan lou ahihna uah, tulel a apai pih uh, government activity leh governemnt office te boycott kichi pen khauh pai sem ding ua, huai tan a leng government lam in a ngaihsak tuan kei ua leh, ahongtung ding September 29, 2012 apan a district pumpi a general strike puang ding uh hidan in genkhawm uhi. zol

TET form hawmna khawl lou in paizom

LAMKA, September 26 : Board of Secondary Education, Manipur BSEM in teacher ki laak hun chiang a zat ding chi a dan thak a bawl uh, Teachers Eligibility Test, TET toh kisai, tukal bul apan in ZEO office ah hawm in om pan hi. A kihawm pat ni in, hoih tak in ZEO office ah kihawm in a form te leng beipah a, himahleh a ni nawn apan a JAC pawl in government office teng a khaak sak ziak un, security khauh tak ven na nuai ah ZEO office mah ah haksa tak in hawm uhi.

TET toh kisai mipi a ding liau liau ahihna ah chi in CDSU ten ZEO office staff te toh ki thu zaak in, office kong a Synod House a hawm ding chi a thukim in, tuni apan in TET form te ZEO office kong ah hawm in om hi. Huai lou in, CDSU te panlak na ziak mah in, TET form hawm theih a om in bei pah pah a, himahleh, hiai pen a concern department te ngak hi leh form te bei a, ni khat khawl a a ni nawn a hawm zel ngai ding chih na ziak in CDSU lam in ZEO office lam te noh a, a bei hun hun a, Imphal a tai suk a form te la ding a a noh ziak ua, khawllou a niteng a hawm theih a om hidan in leng gen ua, form man pen, mimal gari a tai ahihna uah chi a Rs. 30 a pung sak mah uh hidan in gen uhi. zc

EM IN KIPAHPIH

Manipur Public Service Commission saina nuai a Manipur Civil Service Combined Examination a lohchinna ngah S Thienlaljoy Gangte, Paukhenmung leh Lunzamung Tungnung te Hiangtam Lamka ADC Constituency mipi in kipahpih a kisaktheihpih mahmah ahihdan Kamsuanlun bialtu MDC and Executive member ADCC in kipah thusuahna ah taklang hi.

Medical Camp om ding

Lamka, Sept-25: Dist. Health Society/CCpur saina in Sept 26, 2012 in Sagang PHC nuai a Moirang Mantak khua ah Mobile Medical Camp leh Reproductive Child Health camp kithuah  om ding hi. Sept 27 in Singngat sub-division a Tuima khua ah om nawn ding a, Sept 29 in Sangaikot block sunga Songpeh khua ah om ding hi. Tuima Health Camp ah Totorawt Editor pu le va tel ding a, zingchiang sept 27, 2012 in zin ding chih thuzak ahi.

Ni 40 sung an-ngawl thumna kipan

Lamka, Sept-25: Ms Lalremsiem leh EFCI Central Numei pawl kigawmte panlakna in tuni’n  Muolvaiphei a Nehemiah Prayer Mountain ah  ni 40 leh zan 40 sung an-ngawla thumkhawmna  kipan a, Rev Zoramsiem, Gen Secy Central Women, EFCI/Shillong in hongkhia hi. Thumkhawmna ah  khawpi sung mun tuamtuam apan EFCI te ban ah saptuam tuamtuam apan mi tamtak tel uhi. An-ngawl thumna Nov 3, 2012 tan sunzom ding uhi.